SUDANHA PER LO SUDARI

1 Ai pilhat un pauc de repaus. Mi faía mestier! Que dies? Qu’es ja cen que fau tota la santa jornada? Plan! Que se començam ensinda, aneràs pas gaire luènh dins aquesto roman. Dins LO MIEU roman… Alora, ai pilhat un pauc de repaus, que lo voargues ò non! Fa de ben… Cau dire qu’ai totplen travalhat dins lu mes que vènon de passar… Que dies mai? Non mi creses? Comences pròpi mau!… Se ja à la promiera pàgina  mi lèves l’envuèia d’anar mai luènh, coma farèm? Segur, se dins CÒUP DE SOLEU as liejut solament li promieri pàginas, mi vas dire que siéu un pelandron e ti vas pensar que mi foti de tu, vist que si tractava de m’anar faire un viatge en Polinesia: la mar, lo soleu, la sabla cauda, li bèli filhas, ti dies que mi siéu pagat de boan temps per pas car … Ma aquò, sabes, fa vèire unicament que non as liejut la seguida dau mieu roman (ò que l’as liejuda sensa gaire d’atencion e non l’as capida). Auries au manco poscut legir la quatrena de cubèrta, qu’anonçava de peripecias… Perqué, se l’auguesses fach coma si deu, saupries que lo viatge fuguèt animat. Ja dins l’avion, ma finda per cen que si debanèt après. E non ti parli de tot cen qu’ai fach entre la fin d’aquela aventura e esto sera! Aquò son de cauas qu’arregàrjon degun d’autre en defoara de ieu (e dei personas que li èron mescladi, naturalament, ma non n’en parlerai aquí, que non es lo mieu prepaus). Alora, aquí, denant d’anar mai luènh dins la tieu lectura, cau que pilhes una decision: Promiera solucion: As ben liejut CÒUP DE SOLEU e sabes pron de que parli. Alora, ges de problema: vas directament au capítol 2. Segonda solucion: As liejut CÒUP DE SOLEU en entier, ma non siés d’acòrdi mé cen que dii. Alora, fas una caua: paues lo libre qu’as en man e tornes lièger CÒUP DE SOLEU; après, veiràs ben qu’ai rason ieu! Tèrça solucion: As liejut unicament lo començament de CÒUP DE SOLEU. Aquí parier, paues lo libre qu’as en man e vas acabar la lectura de CÒUP DE SOLEU. Quarta solucion: Non as liejut CÒUP DE SOLEU. Que vergonha! Permete-mi de ti dire qu’as augut toart e non sabes cen qu’as mancat! Segur, non es indispensable per capir lo present roman. Ma à la tieu plaça lo liegerii. Veiràs que t’agraderà. E bessai finda que, se non l’as fach, deuries lièger lo promier roman de la tièra, UNA SETMANA ORDINÀRIA.  Ti seria bessai de quauqua utilitat…   2 Aüra que siés à jorn mé la lectura dei autri aventuras dau tieu policier preferit , podèm anar de l’avant… Per lo moment, siam à jugar ai cartas. Tòni, Rachid, Ahmed e ieu, ensèms per una partida de vito , per mi vendicar de la belòta de l’autre còup, que mi siéu totjorn pas remés d’aquela frusta! Semblava que li cartas si siguésson toti ligadi còntra nautres! E Tòni, m’au sieu biais de si pilhar per un grand jugaire quora cadun saup que conoisse à pena la diferença entre l’as de caire e lo varlet de flor… Pròpi un jugaire dau presèpi, coma si di!… Es Tòni que fa li cartas, a ja ganhat aquò, generalament lo vito es un juèc que li va mai ben que la belòta! Ò pas tant mau…

SOBRAN DE LA PAGINA	LIBRES	QUESTIONS DE LENGA
BIOGRAFIA	PER LEGIR	ACUÈLH