T’empoarterai
Au calabrun
Vèrs la nuèch estelada
Mi siés venguda
S’escapa lo fum
Dei pensiers mai escurs.
Ti menerai
Dins lo perfum
De la mieu passejada
Dins la quietuda
Li aurà per cadun
Un refranh de bonur.
Vène, pichona,
Ti voali tant ben
Esta nuèch anerèm
Sus li alas dau temps
Vène, pichona,
Ti voali tant ben
D’una votz tot-ai-doi canterèm
T’empoarterai mé ieu…
T’empoarterai
Fins au sobran
D’una foala envolada
À la barona
Li rimas s’en van
Au país de l’amor.
Ti menerai
Man dins la man
Dins la nuèch enmascada
Ja s’abandona
La luna plan plan
Davant tant de doçor.
T’empoarterai
Sus lo camin
D’una nuèch pantaiada
La noastra dança
Florisse au jardin
Dont s’inventa deman.
Ti menerai
Fins au matin
Ti farai una aubada
La mieu romança
Dirà sensa fin
Un amor ben plus grand.
Reinat TOSCANO, lo 25 de febrier dau 2003
Cada nuèch inventes
Un amor sensa fin
De l’ora plasenta
Mi fas ver lo camin.
Au matin plus degun
Siéu solet un còup de mai
Cada pantais parte en fum
L’amor si degalha…
Dont va la Luna
Quand vèn lo jorn?
Dont va la Luna
Quand vèn lo jorn?
Cada nuèch espèri
Un amor per totjorn
D’aqueu grand mistèri
Mi fas rèi e senhor.
Au matin tu t’en vas
Siéu tradit un còup de mai
Dins un malan gigantàs
L’amor si miralha…
Dont va la Luna
Quand vèn lo jorn?
Dont va la Luna
Quand vèn lo jorn?
Au matin silenciós
Siéu perdut un còup de mai
Ieu rèsti aquí malurós
Aquò mi travalha…
Dont va la Luna
Quand vèn lo jorn?
Dont va la Luna
Quand vèn lo jorn?
Reinat TOSCANO, lo 3 de mai dau 2003