Longtemps, longtemps, longtemps
avant la fin dau present siècle,
l'òme èra ben luènh d'aquesta Tèrra...
Venguèt la colonisacion,
e una guèrra cosmica talhèt tota relacion
mé la planeta d'origina...

L'ALFA E L'OMEGA presenta
tota l'istòria de l'Umanitat embastardida,
au lòng d'aquela quista d'un passat idealisat
e vèrs un devenir mau segur
(meme se l'espèr demòra...).

---

Volume 1

(Illustracion JP CALOMILI)

---

ALFA

Amour, sourgent de vida,
L'ome que li si fida
Farà granda culhida
A la sasoun flourida.
 

---

Richard Coar de Lion

Illustracion originala de Bruno FAURERE
(pas presenta dins lo libre)

Richard, en Palestina,
Perde son temps, trampina.
Pi s'en retorna au sieu.
Voales doncas, Boan Dieu,
Que sigue castigat
Per aver lambinat ?
Escotatz ! Escotatz !
Lo rèi Richard qu'aimatz
S'es fach metre en preson !
Un autre a pilhat nom
De rèi à la sieu plaça, 
Un ladre de sa raça,
Dau sieu sang : es son fraire ...
E mena son araire
D'una maniera tala
Que lo país s'encala :
Justícia dispareisse
E Felonia creisse,
Lo pòble afamegat
Mé quauque revoltat
Aspèra lo retorn
Dau rèi naissut d'Amor.
Escotatz ! Escotatz !
Richard, per cu ploratz,
Dins un croton aspèra
L’ànima pura e fièra
Que lo vendrà sauvar.
Es que caurà versar
À l'òme que lo tèn
Foarça marcs, e totplen
De fortunas deuràn,
Per aqueu marrit can,
Passar la Mar estrecha...
Dont es l'ànima drecha
Que lo vendrà cercar ?
E cu lo sauverà ?
Escotatz ! Escotatz !
Vautres toi qu'asperatz :
Un nòble chivalier,
Cantaire vertadier
Segond li lèis d'Amor,
Per li donar larjor
Cavauca de casteu
En casteu. Ensèms m'eu
Vòla lo doç resson
D'una fina cançon...
Audètz Blondeu que canta
E Richard que recanta ?
Escotatz ! Escotatz !
Vautres que tant pregatz :
A retrovat lo rèi !
E lo voastre desrèi
Porrà leu s'acabar :
Richard s'en tornerà !

 (Adaptacion grafica de l'autor) 
 

Audi un bousin d'armada
Dins la siéu avançada,
Mila legioun que van
E vènon e desfàn
Lu maufach per tournà
Cridà la libertà.
Audi lou vent dei stepa,
Touta l'erba que crepa
Souta lou martelà
Que fan à cavaucà
Tant d'esclòp per lu prat
D'un mounde estravirat.
Audi mountà la vous
Dei ome malurous,
Que si mescla de crit
Inoucènt e faidit
E s'en va couma fum
Dintre lou calabrun.
E la pluèia que cala
Dau ciel vitou s'ensala
D'aqueli errour qu'an mes
Sus lou mounde grand pes
De mouòrt e de soufrença:
N'ai clara counouissença
Qu'a la miéu ment cremada
E qu'ai iéu enrimada...
Regargi encara 'n còu
Lou miéu libre: qu pòu
S'en moustrà desranjat
O ben espaventat?
Touti li miéu paraula
Soun luèn d'èstre de faula,
E tout cen qu'ai aquì
Escrich si déu legì
Embé grand'atencioun.
Bessai ben qu'un mouloun
De caua aquì cuntadi
Seràn ja capitadi:
La mouòrt, la fam, la pesta,
Lou fuèc e la tempesta...

(grafia d'origina)