SECRET DE CHIN

Es una pichòta fèrma, perduda dins lei còlas dau país aut de Var, en quauque luèc entre La Verdiera e Sant Julian. Pas ren d’una granda bastida coma aquélei que se pòdon vèire, m’an dich, en d’àutrei luècs de Provença, onte la tèrra generosa faguèt totjorn leis òmes rics. Pas ren nimai d’aquélei tenements viticòlas coma pareisse que s’en véson mai bas, onte leis ostalàs sèmblon de casteus au mitan de vinhas que n’en veses pas la fin. Non, aquí siam ja un pauc en montanha, mai à l’estrech entre una riba e l’autra, amé de sasons que péson de mai en mai sobre l’esquina lassa dei trabalhaires, e lei bastiments son fachs sobretot de vièlhei pèiras pauc ò pron desganguilhadas que degun saupèt jamai quora foguèron quilhadas ni cu n’en fuguèt lo murador. L’abitacion, tant mau que ben, es totjorn estada entretenguda, just çò que fau per la tenir drecha e assostar cu i viu. Mai per lo rèsta, es pas parier: barris encalats, teules prefondats, tant que, de còups que i a, quora plòu, lei quàuquei bèstias que sóbron se dévon sarrar coma pòdon per non èstre banhadas.

Avèm jamai agut de vesins. Vòli dire de vesins immediats que siguèsson just à costat de nòstra fèrma, aquélei vesins que se pòdon retrobar per una velhada ò que se pòdon simplament rescontrar dins la jornada per barjassar un moment. Per leis anar trobar, nòstrei vesins, a totjorn faugut caminar longtemps per lei pendís. I avié ben una fèrma, d’un temps, sus la còla d’en fàcia, onte avién de fedas, mai…




SOBRAN DE LA PAGINA TABLEU GENERAU DEI LIBRES
PAGINA D'ACUÈLH BIOGRAFIA