publicat per Modal
Distribucion: FAMDT per correspondéncia e en cò dei negòcis de discs.
ai escrich una cançon per lo Corou de Bèrra:
Di-mi pichon.
Di-mi, pichon…
Di-mi, pichon, lu tieus pantais,
Lo pebre d’ai de la tieu vida,
Di-mi dont van lu tieus pantais
La tieu cançon es tant polida.
Cada matin, lu uèlhs dubèrts,
Voàs cercar lo bonur sensa fin promés au noveu jorn,
Per agantar un tròç de temps
Poarges la man vèrs un monde en colors.
Vòlon,
S’envòlon
Lu tieus pensiers,
Vòlon,
S’envòlon
Lu tieus espèrs.
E t’en vas, passeron renaissent,
E t’en vas dins lu braç dau vent.
Veiràs, pichon, m’ai tieus pantais
Que dins lo coar ti fan tempèsta,
T’inventeràs un mes de mai,
Coma un printemps, coma una fèsta.
Siés ja partit jugar, balar,
Amorós à t’en faire petar la tèsta e mai lo coar,
Farandolaire au temps que va,
Au temps que va ben tròup vito e tròup foart.
Auràs, pichon, lu tieus pantais
E ren qu’aquò per ti defendre
Còntra lu còups e lu travalhs,
Totjorn pilhar, jamai n’en rendre…
As l’impression de pas capir
Lo malur que ti vèn sus l’esquina e pica à t’ensucar,
Ma fa pas ren, t’en voàs partir,
Lo coar leugier, totjorn lèst à cantar.
De pantais,
De pantais totjorn mai grands,
Tant que n’auràs serà boan signe,
Lo jorn que n’auràs plus,
Aquò vorrà dire que seràs vièlh
Sensa avenir,
Sensa espèr :
Seràs vièlh !
Veiràs, pichon, lu tieus pantais,
Arriberàs à lu far viure,
E veiràs ben qu’un jorn bessai
Un bèl estiu ti farà liure.
Desplegueràs doi alas d’aur
Per anar passejar m’ai gabians damont dintre l’azur,
Per ti raubar de bèi tresaurs,
Mile moments solelhats de bonur.
Reinat TOSCANO, lo 19 de febrier dau 2002.