|
Cu va ganhar? Cu perderà? Aquò m’en bati! Aquò m’en bati! Li guèrras son cridadi, Cu va plorar? Cu va plorar? Aquò solet còmpta per ieu! Aquò solet còmpta per ieu! M’excuserètz Se non piqui dei mans Davant l’enfant que plora M’un lagrimar tant foart Que cuèrbe lo bosin dau canon. M’excuserètz Se non piqui dei mans Davant tant de malora, Aqueu perfum de moart Qu’empèsta lo refranh dei cançons. M’excuserètz Se la bila mi vèn S’audi parlar de guèrra Quand tant de gents an fam E vívon cada jorn dins lo dòu. M’excuserètz Se la bila mi vèn Quora sobre la Tèrra I a de bandits que fan De sòus en semenant mila paurs. M’excuserètz Se non poadi cridar M’ai lops fanatisaires, Negres faussons tant bruts Que fan m’ai religions lu sieus pastís. M’excuserètz Se non poadi cridar Emb’ai politicaires, Mençoneguiers venduts Qu’an pas per ambicion lo país. M’excuserètz S’ai envuèia de patz, Se cresi en un pantais De libertat vorguda, D’amor e d’amistat per deman. M’excuserètz S’ai envuèia de patz, Se canti encar ben mai Aquela flor naissuda Au coar enlagrimat d’un enfant. Reinat TOSCANO, LO VAU 6 de novembre dau 2001.
|
Per aver la particion completa,
si pòu clicar sus la clau aquí sota:
