|
Niça, lo 7 de janvier dau 2009 Sénher Comissari, Despí ja d’annadas, siéu policier à la Ciutat dei Molins. Policier de proximitat, per repilhar una expression bessai passada de mòda... Mi díon Matieu SAMPEYRE. Per lo moment, siéu en vacanças e, vist que siéu partit avant la dubertura dau noveu Comissariat, ai pas’ncara augut lo temps de li venir faire un torn. Finda, mi faríon mestier quauqui informacions per lo mieu retorn. Dont es lo voastre bureu? Dont es lo mieu? Coma son repartits lu servicis dins lu diferents plans? E lo sotasoal? N’i a un? À que sièrve? Non es tant per ieu que vos demandi aquò, es sobretot per lo mieu autor, qu’aquel arlèri non a lo sens de l’orientacion e risqueria de mi faire barrutlar d’un caire e de l’autre per pas ren, en foncion de la sieu imaginacion! Non mi vorrii perdre! Cau finda dire, à la descarga d’aqueu manejaire de pluma, que lo Comissariat es bastit pròpi dont si quilhava la maion que son paigrand avia bastit m’ai sieu mans, e aquò li a segurament un pauc virat la tèsta... D’aitant mai que, en sovenir de la sieu enfança passada dins aqueu luèc, non a ben digerit de non èstre estat convidat à l’inauguracion... Cau ben reconóisser qu’aquò es una vergonha! E ieu li doni rason! Pensatz un pauc! Un qu’a viugut aquí tant d’annadas de la sieu vida, que n’es estat caçat per una pretenduda utilitat publica, e aüra lo destin fa que li torna per personatge de roman interpauat! Seria estat normal, mi sembla, de lo convidar à l’inauguracion, eu que, en mi donant vida, es estat premiat à Niça e fins en Calàbria! Enfin, anam pas revenir sobre cen qu’es pas estat, qu’aquò sièrve de ren! Ma podètz faire quauqua ren: li dire un pauc coma es agençat lo voastre Comissariat, per que ieu non mi perdi dins un corridor, per que non passi d’oras e d’oras à cercar un bureu ò un autre. Vos laissi imaginar, s’un jorn vèni travalhar e, lo sera, au moment de m’en tornar au mieu, non tròvi plus la sortida! En esperant qu’aurètz capit la situacion, vos pregui de crèire, Sénher Comissari, à l’expression dei mieu saludacions respiechoï, Matieu SAMPEYRE
|
|
|
|
|