Dòna qu' avètz lo nom de la belessa,
Dins lo vòstre regard viu lo soleu
Qu' ai coneissut au mieu país tant beu:
Vaquí ja que lei jorns de ma tristessa

Coma printemps se pínton d' alegressa,
Donant à mei pensiers lo gust dau meu
Que segur trobarai dins lo casteu
D' amor verai que vos a per mestressa.

Laissatz-me vos cantar lo fuèc que naisse
Dedins mon còr tant leu que vòstra cara
Esclaira l' aiga de la mar tant clara

Onte vai mon bateu qu' ara lo guida
Lo vent d' Amor. E cau qu' Amor me laisse
Vòstra beutat, cada jorn de ma vida.