Damont sus la montanha
Dont juèga lo camoç,
Ai sautat la baranha
E descubèrt un potz.

Ai beugut l'aiga clara
De la tèrra naissuda,
E ai vist la tieu cara
Dins lo potz esconduda.

Cu doncas m'a menat
Sobre d'aqueu camin?
Cu doncas m'a donat
De vèire en lo matin

La tieu cara polida
Qu'à-n-un àngel asraubada
E fa florir la vida
Au coar dont es entrada?

Es bessai un pantais
Qu'esto matin ai fach,
Pantais dau mes de mai,
Fach de meu e de lach...

Es bessai lo soleu
Qu'ai laissat au Mièjorn
E que veirai, noveu,
Deman, sobre li flors...

E mai segurament
Serà lo flume negre
Que lo mieu sentiment,
Luènh de Niça, vòu segre...